Қўқонда бола ўғриси пайдо бўлдими?
Ҳолат юзасидан расмий муносабат билдирилди.
Ижтимоий тармоқда Фарғонада эркак 6 ёшли болани машина багажига солиб, олиб қочгани айтилган хабарлар тарқалди.
Аниқланишича, ҳолат 14 май куни Қўқон шаҳрининг Обод юрт кўчасида содир бўлган. вояга етмаган бола қўшнисига тегишли уйнинг девор ва ойнасига тош отиб синдирган. Буни кўрган уй эгаси вояга етмаган болани қўрқитиб қўйиш мақсадида ўзига тегишли бўлган Nexia-2'нинг юкхонасига солиб, автомашинани ҳаракатлантирган. Шу пайтда боланинг онаси кўчага чиқиб, машинани тўхтатиб, фарзандини машинадан тушириб олган ҳамда ўртада ўзаро жанжал келиб чиққан.
Мазкур ҳолат юзасидан фуқарога нисбатан МЖтКнинг 183-моддаси, яъни майда безорилик тартибида ҳужжатлар расмийлаштирилиб, тегишли суд органига юбориш чораси кўрилган.
