Қашқадарёда коллеж биноси пиллахонага айлантирилди
Ҳолат юзасидан масъуллар изоҳ берди.
Ижтимоий тармоқда Қашқадарё вилоятининг Қамаши туманидаги касб-ҳунар коллежларидан бирининг биносида пилла боқилаётгани айтилган видео тарқалди.
Ҳолат юзасидан расмийларнинг изоҳ беришича, таълим муассасаси Сув хўжалиги вазирлигига қарашли Сув хўжалиги ва мелиорация коллежи ҳисобланади. У 750 ўринга мўлжалланган. Аммо айни кунда бинода 176 нафар ўқувчи ўқийди. Аксарият хоналар бўш ва жиҳозсиз бўлгани учун бўш турган хоналардан фойдаланиб, даромад қилиш, белгиланган режани бажариш мақсад қилинган.
"Пилла қуртини ёрдамчи хўжаликдаги ходимларимиз парвариш қилади. Ўқувчилар таҳсил олувчи бино бу бинодан алоҳида жойлашган бўлиб, пилла боқиш дарс жараёнларига халал бермайди", — дейди муассаса директори.
Таъкидланишича, таълим даргоҳи жорий мавсумда 168 кило пилла топшириши кераклиги белгиланган.
