Юк машинаси уриб юборган ўқувчи вафот этди
Ҳолат Қашқадарёда содир бўлган.
Қашқадарё вилояти Кўкдала туманида юк машинаси пиёдалар йўлакчасидан ўтаётган ўқувчини уриб юборди. Ҳодиса 2024 йил 15 май куни содир бўлган.
Камаз юк машинаси Самарқанд-Ғузор автомобиль йўлидан ҳаракатланаётиб Кўкдала туманида жойлашган 37-мактаб олдидаги пиёдалар йўлакчасидан ўтаётган 2-синф ўқувчисини уриб юборган. Оқибатда ўқувчи оғир тан жароҳатлари олиб, ҳодиса жойида ҳалок бўлган.
Ижтимоий тармоқларда ҳодиса тасвирланган видео тарқалди. Бир гуруҳ ўқувчилар пиёдалар йўлакчасидан ўтмоқчи бўлишганда Некция тўхтаб уларга йўл беради. Болалар йўлакчадан ўта бошлаганда иккинчи қатордан катта тезликда келган юк машинаси улардан бирини уриб кетади.
Қайд этилишича, ҳодиса юзасидан Кўкдала туман ИИБ тергов гуруҳи томонидан Жиноят кодексининг 266-моддаси 2-қисми билан жиноят иши қўзғатилган. Ҳайдовчига нисбатан қамоққа олиш тарзидаги эҳтиёт чораси қўлланган.
