Метрополитен фарроши иш вақтида гул олгани учун ойлиги "қирқилгани" айтилди
Ҳолат юзасидан муносабат билдирилди.
Ижтимоий тармоқларда метрополитен фаррош ходимига иш вақтида йўловчилардан бири гул тақдим этилгани ва шу сабабдан ушбу ходимнинг ойлик маошидан огоҳлантириш тарзида кесилгани ҳақида хабарлар тарқалди.
"Тошкент метрополитени" ДУКнинг маълум қилинишича, видео материалдаги ходим Алишер Навоий бекатида 1,5 йилдан буён фаолият олиб борувчи Назарова Ҳилола исмли фаррош бўлиб, унга нисбатан ушбу ҳолат юзасидан ҳеч қандай огоҳлантириш ҳамда ойлик маошидан жарима белгиланмаган.
"Шу ўринда ижтимоий тармоқ фойдаланувчиларидан бу каби ўз тасдиғини топмаган маълумотларни тақдим этмасликларини ва бунга қонунчиликда белгиланган тартибда жавобгарлик борлигини эслатиб ўтамиз", — дейилади хабарда.
Аввалроқ видеони тасвирга олган блогер фаррошнинг ойлиги "қирқилгани"ни айтганди.
"Аҳамият берган бўлсангиз, бир видеода фаррош опага "гулни ушлаб туринг, оёғимни боғлаб олай", дегандим. Шу видеодан кейин опанинг ойлигини қирқиб ташлашибди. Мен ўзимдан нафратланиб кетдим. Бир инсоннинг секундини олиб хурсанд қиламан деган мақсадда видео олган эдим. Балки у хурсанд бўлгандир, аммо видео тарқалганидан кейин уларнинг ойлигини қирқиб ташлашибди", — дейди блогер.
