Танзила Нaрбaева Уммон Султонлигининг Ўзбекистондаги элчиси билан учрашув ўтказди
Учрашувда икки мамлакат ўртасида савдо-иқтисодий, маданий-гуманитар ва парламентлараро алоқаларни ривожлантириш ва янги босқичга олиб чиқиш масалалари кўриб чиқилди.
Олий Мажлис Сенати раиси 27 май куни Уммон Султонлигининг Ўзбекистондаги фавқулодда ва мухтор элчиси Вафо Жабр Носир ал-Бусаидий билан учрашди.
Томонлар ўзаро савдо айланмаси кўрсаткичи икки давлат салоҳиятини ифода этмаслигини, тадбиркорлар ўртасида қўшма бизнес лойиҳаларни фаоллаштириш лозимлигини таъкидлади.
Мулоқот давомида фан, таълим, маданият йўналишларидаги ҳамкорлик, мамлакатлар туризм салоҳиятидан янада кенгроқ фойдаланиш бўйича амалий саъй-ҳаракатларни бирлаштириш бўйича фикр алмашилди.
Шунингдек парламентлараро мулоқотни ўзаро ташрифлар орқали фаоллаштириш, икки мамлакат қонун чиқарувчи органлари тегишли қўмиталари ўртасида тажриба алмашиш ва яқин алоқаларни ўрнатиш муҳимлиги қайд этилди.
