Экологик вазиятни баҳолаш учун ягона мониторинг тизими ишга туширилади
Бу ҳақида Экология, атроф-муҳитни муҳофаза қилиш ва иқлим ўзгариши вазирлиги маълум қилди.
Ахборот хизмати раҳбари Лола Раҳмонбоеванинг билдиришича, вазирлик ва унинг тизим ташкилотларида рақамли инфратузилмани ривожлантириш бўйича тизимли ишлар амалга оширилмоқда.
Белгиланмаган жойларга чиқинди ташланишининг олдини олиш мақсадида республика бўйича 200 га яқин видеокамералар ўрнатилиб, вазирликнинг ситуацион марказида доимий назорати йўлга қўйилди.
Экологияга оид масалаларни кенг ёритиш, аҳолининг экологик маданиятини ошириш мақсадида “Экология портали” ахборот тизими gov.uz.ecо веб-сайти ишга туширилди.
Янги экилган дарахт ва буталарни мониторинг қилиш, ноқонуний кесилишининг олдини олиш мақсадида “Яшил макон” ягона электрон ахборот тизими yashilmakon.ecо яратилди.
Келгусида экология соҳасида хизматларни сифатли олиб бориш мақсадида вазиятлар маркази фаолияти тўлиқ йўлга қўйилади. Ягона геоахборот маълумотлар базасини юритиш учун мониторинг тизими ишга туширилади.
Вазирликнинг мавжуд йўналишларини рақамлаштиришда жами 8 та ахборот тизими жорий этилади. Электрон ҳукуматни ривожлантириш мақсадида вазирлик томонидан кўрсатиладиган давлат хизматлари аҳоли учун соддалаштирилади.
Тизимда меҳнат қилаётган мингдан ортиқ ходимнинг IT соҳасидаги билим ва малакалари оширилади. 20 нафар ходим халқаро таълим платформалари орқали ўқитилади.
