Тошкентда автобус тепловоз билан тўқнашиб кетди
Ҳолат юзасидан расмий муносабат билдирилди.
Ҳолат бугун, 29 май куни соат 15:50 ларда Сергели тумани Қумариқ кўчасида юз берган. 11-сонли йўналиш ҳайдовчиси И. А. бошқарувидаги автобус тартибга солинмаган темирйўл кесишмасидан ҳаракатланиб келаётган тепловоз билан тўқнашув содир этган.
Ҳодиса оқибатида тан жароҳати олганлар йўқ, автобус техник шикастланган. Йўл-транспорт ҳодисаси Тошкент шаҳар ИИББ ЙҲХБ ходимлари томонидан ўрнатилган тартибда расмийлаштирилган.
Дастлабки суриштирув натижаларига кўра, ҳайдовчи А. И. автобусни бошқариб келиб темир йўл кесишмасида тўхтаган ва бошқа транспорт воситалари билан бирга ҳаракатни бошлаб, темирйўл кесишмасидан ўтаётганда тепловоз унинг орқа ўнг томон кузов қисмига келиб урилган.
Шунингдек, тепловоз темирйўл кесишмасидан ўтишидан аввал йўналиш бўйлаб транспорт воситаларини тўхтатиб турувчи темирйўл назоратчи ходими воқеа жойида бўлмаганлиги сабабли транспорт воситаларини тўхтатиш чоралари кўрилмаган.
