“Ўзбекистондаги энг даҳшатли аттракцион” фаолияти вақтинча тўхтатилди

Ижтимоий тармоқларда “Ўзбекистондаги энг даҳшатли аттракцион” деб номланган видео тарқалди. Ҳолат бўйича Саноат, радиация ва ядро хавфсизлиги қўмитаси маълумот берди.

 

Мазкур видеолавҳада акс этган чархпалак аттракциони қўмитанинг масъул ходимлари томонидан дастлабки ўрганишларга кўра, Андижон шаҳри Бобур номли истироҳат боғида жойлашган. Мазкур истироҳат боғи Бобур халқаро жамоат фонди тасарруфидаги боғ бўлиб, ҳозирги кунда тадбиркор “Люкс аттракцион” МЧЖ раҳбари M.Атабаев томонидан ижарага олиниб, фаолият юритиб келинган.

 

Шунингдек, видеолавҳадаги тасвирланган ҳолатлар 2024 йил жорий ҳолати эмаслиги ва тасвирлар қўмита фаолияти доирасидан ташқари, яъни қўмита учун номаълум мақсадларда тасвирга олингани ва тасвирга олиш ва ундан кейинги вақтда ушбу аттракционда бахтсиз ҳодиса ва жароҳат олганлар йўқлиги маълум бўлди.

 

Айни пайтда боғдаги ушбу аттракцион ҳолати ишчи гуруҳ томонидан ўрганилаётгани сабабли унинг фаолияти вақтинча тўхтатилган.