Тошкент туманида “Тез ёрдам” шифокори калтакланди
Ҳолат юзасидан ҳокимлик расмий муносабат билдирди.
Тошкент вилоятининг Тошкент туманидаги хонадонларнинг бирига чақирув билан борган “Тез ёрдам” шифокори калтакланди. Ҳолат юзасидан туман ҳокимлиги расмий муносабат билдирди.
Қайд этилишича, 1 июнь куни соат 16:35 да Тошкент тумани Дилкаш кўчасидаги уйда яшовчи 26 ёшли Ж.O.дан бош оғриғи шикояти билан мурожаат келиб тушган. Шифокор T.Р. ва фельдшер Н.Ў.дан иборат бригада манзилга соат 16:45 да етиб борган.
Бемор шифокорга бош оғриғи, безовталик, умумий ҳолсизлик шикоятлари борлигини ва буйрак касаллиги бўйича даволанаётганини айтган. Шифокор бирламчи текширув ўтказиб, бемордаги оғриқни қолдириш учун фельдшерга оғриқ қолдирувчи дори воситасини шпритсга тортишини сўраган.
Шифокор беморга қўшимча касалликлари бўйича саволлар бераётган вақтда, бемор шифокорга қараб “сен кимсан, ишингни тезроқ қил” дея ҳақоратлай кетиб, ўрнидан туриб, тўсатдан шифокорнинг юзига мушт туширган. Шифокорнинг лаби ҳамда пастки жағ соҳасидан қон кетишни бошлаган ва бироз вақтга карахтлик ҳолати кузатилган. Ҳолат бўйича ҳудуд профилактика инспекторига хабар берилган.
Шифокор бошқа бригада билан ТТА-3 Юз-жағ жарроҳлиги бўлимига олиб келинган. Жароҳат жойи тикилиб, қон оқиши тўхтатилган. Шифокор ишини давом эттириш мақсадида иш жойига қайтган.
Бироз вақтдан сўнг, шифокорда бош оғриғи, бош айланиши, кўнгил айниши, умумий ҳолсизлик кузатилган ва зудлик билан ТТА-2 клиникасига госпитализация қилинган. ТТА-2 Нейрохирургия бўлимига соат 23:45 да “Бош мия ёпиқ жароҳати. Бош мия чайқалиши. Ўнг томон пастки лаб соҳасида тикилган жароҳат. Ўнг пастки жағда юмшоқ тўқималар лат ейиши” ташхиси билан ётқизилган.
Ҳозирда жабрланган шифокор тиббий муолажалар қабул қилмоқда.
