Сурхондарёда бозорчи аёл ИИБ ходимлари билан жанжаллашди
Ҳолат юзасидан ҳокимлик маълумот берди.
Ижтимоий тармоқда Сурхондарё вилоятининг Шўрчи туманида сотувчи аёл билан Ички ишлар ходимлари ўртасида низо юзага келгани акс этган видео тарқалди.
Маълум бўлишича, ҳолат 2023 йилнинг сентябрь ойида юз берган. Ўша вақтда Ички ишлар бўлими ходимлари томонидан маҳсулотларни йўлларга олиб чиқиб сотаётган сотувчиларга тушунтириш ишлари олиб борилган.
Аммо аёл қаршилик кўрсатгани учун ходимлар унга далолатнома расмийлаштира бошлаган. Шу вақтда аёл далолатномани йиртиб ташлаб, ички ишлар бўлими ходимларини ҳақорат қилган.
Сўнгра аёл Ички ишлар бўлимига олиб кетилган, унга маъмурий жавобгарлик тўғрисидаги кодекснинг тегишли моддалари билан маъмурий баённома расмийлаштирилган ва базавий ҳисоблаш миқдорининг 10 баробари, яъни 3 млн 300 минг сўм жарима белгиланган.
