Сирдарёда Nexia-1 юк машинаси билан тўқнашди
Ҳолат бўйича вилоят ИИБ ЙҲХБ маълумот берди.
Ижтимоий тармоқда Сирдарё — Тошкент йўлида Nexia-1 автомашинаси юк машинасининг ортидан келиб урилгани акс этган видео тарқалди.
Ҳолат бугун, 19 июнь куни соат 05:30 атрофида Сардоба тумани ҳудудида юз берган. Тошкент-Термиз йўналиши бўйлаб ҳаракатланиб кетаётган Nexia-1 ҳайдовчиси рул бошқаруви пайти ухлаб қолиши оқибатида бошқарувни йўқотиб, ўзи билан бир йўналишда йўл четида тўхтаб турган MAN юк машинасига урилган.
Ушбу ЙТҲ натижасида Nexia-1 автомашинаси ҳайдовчиси ва йўловчиси тан жароҳати олиб тиббиёт бирлашмасига ётқизилган.
Ҳозирда Сардоба тумани ИИБ ходимлари томонидан тергов ҳаракатлари олиб борилмоқда.
