Тошкентда 20 ёшли талаба сувда чўкиб, вафот этди
У курсдошлари билан чўмилиш мақсадида каналга борган.
Ўзбекистон давлат жаҳон тиллари университетининг 3-босқич талабаси сувда чўкиб вафот этди. Ҳолат юзасидан Бош прокуратура матбуот хизмати раҳбари Ҳаёт Шамсутдинов Zamon.uz'га маълумот берди.
Ҳодиса 19 июнь куни Яккасарой тумани Ю.Ражабий кўчаси бўйлаб оқиб ўтувчи “Бўрижар” каналида содир бўлган. 20 ёшли талаба М.И. соат 12:10 ларда курсдошлари Ф.Ғ. ва Н.С.лар билан биргаликда чўмилиш мақсадида келиб, сувга тушган. Сув оқимининг тезлиги ҳамда совуқлиги оқибатида у сувдан чиқолмасдан чўкиб, оқиб кетган.
Тошкент шаҳар ФВБ қутқарувчи ғаввослар гуруҳи томонидан М.И. шу куни соат 15:00 ларда Чилонзор тумани Бешёғоч кўчасида жойлашган “Тошкент Гидроэлектрстанциялари” “Буржар” 4-ГЕС ҳудудидан аниқланиб, вафот этган ҳолатда олиб чиқилган.
Ҳозирда мазкур ҳолат юзасидан Чилонзор туман прокуратураси томонидан терговга қадар текширув ҳаракатлари олиб борилмоқда.
