Бекободда ИИБга олиб кетилган ака-укалардан бири вафот этди

Ижтимоий тармоқда Тошкент вилоятида ИИБ ходимлари томонидан олиб кетилган фуқаро вафот этгани ҳақида хабарлар тарқалди. Ҳолат юзасидан вилоят ИИББ ахборот хизмати маълумот берди.

 

Қайд этилишича, 33 ёшли фуқаро Х.Ю.га нисбатан тергов ҳаракатлари олиб борилиб, тўпланган ҳужжатлар мазмунан кўриб чиқишлик учун Бекобод шаҳар Жиноят ишлари бўйича судига юборилган.

 

19 июнь куни Бекобод шаҳар суди томонидан мазкур жиноят ишини кўриш жараёнида айбланувчи Х.Ю.нинг акалари Д.Ю. ва Д.Ю.лар укасига нисбатан озодликдан маҳрум қилиш жазоси тайинлангандан норози бўлиб, суд залида жанжал кўтаришгани оқибатида жамоат тартиби бузилиши юзага келган.

 

Мазкур ҳолатда жамоат тартибини тиклаш ва фуқаролар хавфсизлигини таъминлаш мақсадида суд залига ҳудудий ички ишлар бўлими ходимлари чақиртирилган. 

 

Чақирувга асосан етиб келган уч нафар ИИБ профилактика инспекторлари томонидан жанжал бартараф қилиниб, ҳуқуқбузарлик ҳолати юзасидан ҳужжатларни расмийлаштириш мақсадида воқеа иштирокчилари шаҳар ИИБ биносига олиб борилган. 

 

ИИБ биносига кириш йўлагида фуқаролардан бири Д.Ю. соғлиги ёмонлашиб, ҳушини йўқотган.

 

Ходимлар фуқарони хизмат автомашинасида шаҳар шифохонасига олиб борган. Тиббиёт бирлашмаси ходимлари томонидан кўрикдан ўтказилган вақтида Д.Ю. вафот этганлиги аниқланган.

 

Ҳозирда фуқаронинг ўлими сабабларига аниқлик киритиш мақсадида суд-тиббий экспертизаси тайинланган. Ҳолат прокуратура органлари томонидан назоратга олиниб, суриштирув ишлари олиб борилмоқда.