Навоийда “права” сотмоқчи бўлган автомактаб раҳбари ушланди
У ЙҲХБда ишловчи танишлари ёрдамида “ишни битирмоқчи” бўлган.
Учта вилоятда ҳайдовчилик гувоҳномаларини олиб беришини ваъда қилган фирибгарлар ушланди.
Навоийда ўтказилган тезкор тадбирда “A.В.” МЧЖ автомактаби раҳбари З.М. фуқаро Ш.Ж.нинг ишончига кириб, гўёки ЙҲХБда ишловчи танишлари ёрдамида Ш.Ж. ва унинг турмуш ўртоғига ҳайдовчилик гувоҳномаларини олиб бериши эвазига 1 000 АҚШ долларини олган.
Фарғонада ўтказилган тезкор тадбирда фуқаро М.М. фуқаро А.Қ.га 1 300 АҚШ доллари эвазига ўқув курсларига қатнашмасдан ҳайдовчилик гувоҳномасини олиб беришини ваъда қилиб, олдиндан 1 000 АҚШ долларини олган.
Самарқанд туманида ўтказилган тезкор тадбирда фуқаролар У.Т. ва Ш.А. фуқаро М.А.га танишлари ёрдамида 1 000 АҚШ доллари эвазига ҳайдовчилик гувоҳномасини олиб беришларини айтиб, шундан 500 АҚШ долларини олган вақтларида ашёвий далиллар билан ушланган.
Мазкур ҳолатлар юзасидан Жиноят кодексининг 25, 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
