Тошкентда мактаб ўқувчиси одам уриб юборди
У юқори тезликда ва светофорнинг қизил чироғида ҳаракатланган.
Тошкентнинг Учтепа туманида 16 ёшли йигит Малибуда пиёдани уриб кетди. Ҳолат юзасидан шаҳар ИИББ ЙҲХБ расмий муносабат билдирди.
Воқеа 27 июнь куни соат 20:10 ларда ТХАЙ кўчаси “Кўркам обод” МФЙ Миллий гвардия биноси қаршисида содир бўлган. 16 ёшли йигит A.X. Малибу-2 автомашинасини катта тезликда бошқариб кетаётиб, йўлнинг белгиланмаган қисмидан кесиб ўтаётган 39 ёшли эркакни уриб юборган. Тан жароҳатлари олган пиёда шифохонага ётқизилган.
Малибу-2 ни бошқарган йигит Учтепа туманидаги 312-мактабнинг 10-синф ўқувчиси бўлиб, ҳодиса вақтида автомобилда яна уч нафар тенгдоши бўлган. Улар юқори тезликда ва светофорнинг қизил чироғида ҳаракатланган.
Айни пайтда ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган, тергов ҳаракатлари олиб борилмоқда.
