Андижондаги қорамолларда номаълум касаллик аниқландими?

Аввалроқ Андижон вилоятидаги қорамолларда нодуляр дерматитга ўхшаш номаълум касаллик тарқалаётгани ҳақида хабарлар эълон қилинганди. 

 

Ҳолат Ветеринария ва чорвачиликни ривожлантириш қўмитаси Ишчи гуруҳи ва ички ишлар идоралари мутахассислари билан ҳамкорликда ўрганилди. Ҳозирда воқеа жойи аниқланиб, ҳолат назоратга олинган.

 

Ўрганиш давомида Ижтимоий тармоқларда расм ва видеолари тарқалган қорамол Избоскан тумани “Анорзор” МФЙда яшовчи Хайрулла Эшонжоновга тегишли эканлиги аниқланган. 

 

Қорамол клиник кўрикдан ўтказилиб, олинган қон ва бошқа намуналар лаборатория текширувларидан ўтказилганда ушбу сигир нодуляр дерматит ёки номаълум касаллик билан эмас, аллергик тошмага чалинганлиги аниқланди.

 

Маълум бўлишича, сигирнинг терисига бундан 24 кун муқаддам, яъни 15 июн куни аллергик тошма тошган. Бу ҳақида эгаси маҳаллий ветеринария мутахассисига мурожаат қилган.

 

Мутахассислар клиник кўрикдан ўтказиб, даволаш ишлари олиб борган. Қорамолнинг иштаҳаси ўрнига келган. Умумий ҳолати яхшиланган ва аллергик тошмалар йўқолган. 18 июнь куни ушбу сигир соғлом бузоқ туққан. Ҳозирда сигир ва боласининг умумий ҳолати яхши.

 

Суриштирув давомида унга озуқа орқали аллергик тошма тошганлигини эгаси ҳам тасдиқлади. Хонадондаги қолган 8 бош қорамолда бундай ҳолат кузатилмаган.