Аэропортда 58 млн сўмлик тилла тўхтатиб қолинди
Йўловчи уларни яширинча олиб ўтмоқчи бўлган.
Бугун, 10 июль куни Истанбул — Тошкент йўналишидаги рейсда учиб келган ва “яшил” йўлак орқали ҳаракатланган йўловчи Ҳ.С.нинг ўзини тутиши божхона ходимларининг эътиборини тортган.
Шундан сўнг фуқаронинг юклари божхона кўригидан ўтказилган. Унинг 1 дона қора рангли қўл сумкаси ичидан божхона назоратига тақдим этилмаган, оғзаки сўровда маълум қилинмаган 15 грамм оқ рангли металлдан ясалган, оқ рангли тошлар билан безатилган заргарлик буюмлари аниқланган.
Бундан ташқари, йўловчи қўлида ушлаб турган полиетилен пакет билан ўралган антиперспирант ичига беркитилган умумий оғирлиги тахминан 61 грамм бўлган сариқ рангли металлдан ясалган заргарлик буюмлари борлиги маълум бўлган.
Аниқланган заргарлик буюмларининг муқобил манбаларда белгиланган қийматига асосан тахминий нархи 58 565 000 сўмни ташкил этган.
Ҳозирда ҳолат юзасидан суриштирув ҳаракатлари олиб борилмоқда.
