Йўловчиларга поезд чипталари алдаб сотиляптими?
Интернетда тарқалган хабарларга изоҳ берилди.
Куни кеча бир гуруҳ ўзбек шоу-бизнеси вакиллари Урганчдан Бухорога келишда поездда ҳаво совитиш тизими ишламаётганидан норози бўлиб, интернетда чиқиш қилишганди. Санъаткорлар уларга кондиционерли купе учун билет сотилганини, лекин вагонлар иссиқ эканини айтишган.
Ҳолатга “Ўзтемирйўлйўловчи” АЖ расмий муносабат билдириб, йўловчиларга алдаб чипта сотилмаслигини маълум қилди.
Қайд этилишича, мазкур йўловчи вагон 1991 йилда ишлаб чиқарилган бўлиб, ўрнатилган тартибда ўз муддатларида техник таъмирлардан ўтказилган.
Техник шартларга кўра, ташқи ҳаво ҳарорати 40 даражадан юқорилаб кетганда вагонларда совитиш самарадорлиги йўқолади. Мамлакатда кузатилаётган аномал иссиқ ҳаво ҳарорати туфайли айрим вагонларнинг совитиш тизимларида носозликлар кузатилмоқда.
Видеолавҳадаги поезднинг йўл давомида ҳаво ҳарорати 40 даражадан юқорилаб кетганлиги сабабли совитиш тизимининг компрессор ускунаси ишламай қолган, натижада вагон совитилмаган.
Поезд Тошкент-Жанубий вокзалига етиб келганидан сўнг унга қўшимча қилиб соз ҳолатдаги вагон уланган ва йўловчилар ушбу вагонга ўтказилган.
“Ўзтемирйўлйўловчи” АЖ раҳбарияти йўловчиларга келтирилган ноқулайликлар учун узр сўраган.
