Жазони ижро этиш муассасаларида алкотестердан фойдаланиш бошланади

“Ички ишлар вазирлиги озодликдан маҳрум қилиш туридаги жазони ижро этиш муассасаларининг ички тартиб қоидаларига қўшимчалар киритиш тўғрисида”ги буйруқ лойиҳаси эълон қилинди.

 

Манзил-колонияларида жазо муддатларини ўтаётган 9603 нафар (9169 нафар эркаклар, 434 нафар аёллар) маҳкумлар томонидан 2023 йилда 371 та алкоголь маҳсулотларни истеъмол қилиш билан боғлиқ қўпол тарзда тартиббузарлик содир этилган.

 

Манзил-колонияларида жазо муддатини ўтаётган маҳкумлар соқчисиз, аммо назорат остида сақланиши, яъни муассаса ҳудудида эркин ҳаракатланишга имконияти мавжудлиги, шу билан бир қаторда, иш билан боғлиқ тарзда муассаса ҳудудидан ташқарида ҳам бўлишлари натижасида уларни назорат қилиш жараёнида қийинчиликлар юзага келтиради.

 

Юқоридагиларни инобатга олган ҳолда, манзил-колонияларида жазо муддатини ўтаётган маҳкумлар томонидан алкоголь маҳсулотлари, шунингдек таркибида спирт бўлган бошқа маҳсулотларни истеъмол қилиш ҳолатлари фактини тезкорликда аниқлаш мақсадида колония фаолиятига алкотестер мосламаларини жорий қилиш ва норматив-ҳуқуқий ҳужжатларда алкотестер мосламаларидан фойдаланиш тартибини белгилаш зарурияти мавжуд.

 

Буйруқ лойиҳасида Ўзбекистон ички ишлар вазирининг 2012 йил 29 декабрдаги 174-сон буйруғини амалдаги норматив-ҳуқуқий ҳужжатларга мувофиқлаштириш билан бир қаторда, манзил-колониялари навбатчилик қисмларига алкотестер воситасини ўрнатиш ҳамда мазкур муассасаларда жазо муддатини ўтаётган маҳкумлар томонидан содир этилаётган тартиббузарликлар сонини камайтириш мақсади кўзланган.