Тошкент аэропортида фуқаро тўппонча олиб ўтмоқчи бўлди
Ҳозирда ҳолат юзасидан суриштирув бошланган.
Тошкент халқаро аэропортида пневматик тўппонча олиб ўтмоқчи бўлган фуқаро тўхтатиб қолинди. Бу ҳақида “Тошкент-АЭРО” ИБК ахборот хизмати маълум қилди.
Қайд этилишича, 22 июль куни соат 15:50 ларда Внуково — Тошкент йўналиши бўйича учиб келган Ўзбекистон фуқаросига тегишли йўл сумкалари божхона кўригидан ўтказилган.
Натижада божхона назоратига тегишли тартибда тақдим этилмаган, муқобил манбаларга кўра тахминий қиймати 700 минг сўм бўлган жами 1 дона “КР-18” русумли пневматик тўппонча ва “ANGRY BB’s” номли оғирлиги 1 кг бўлган шарсимон шаклдаги пластик ўқлар борлиги аниқланган.
Ҳолат юзасидан суриштирув ишлари амалга оширилмоқда.
