159 нафар абитуриент тест синовларидан четлаштирилган

 

АОКАда Билим ва малакаларни баҳолаш агентлиги раҳбарияти иштирокида ўтказилган матбуот анжуманида 2024/2025-ўқув йили учун таълим ташкилотларига кириш тест синовларининг дастлабки якунлари юзасидан маълумот берилди.

 

2024-2025-ўқув йилида олий ва профессионал таълим муассасаларига кириш тест синовлари 2024 йил 14-25 июль кунлари “аввал тест, сўнг танлов” тамойилига мувофиқ 73 та катта сиғимли бинода очиқ ва холис ўтказилди.

 

Жараённи хавфсиз ва беталафот ўтказиш учун 1 578 нафар ички ишлар, 833 нафар Миллий гвардия, 314 нафар Ёнғин хавфсизлиги ва 233 нафар Соғлиқни сақлаш тизими ходимлари жалб этилди. Тест синовларини адолатли ва шаффоф ўтказиш мақсадида кенг жамоатчилик орасидан очиқ танлов ўтказиш орқали 3 000 нафарга яқин гуруҳ назоратчиси, шунингдек, гапириш ва эшитишда нуқсони бўлган абитуриентларга амалий ёрдам кўрсатиш мақсадида 120 нафар сурдотаржимон жалб этилди.

 

Ҳужжат топширган 805 688 нафар абитуриентнинг 740 352 нафари (91,9%) тест синовларида иштирок этди, 65 336 нафар (8,1 %) абитуриент турли сабабларга кўра қатнашмади.

 

Тест синовларида иштирок этган 740 352 нафар абитуриентдан 418 минг нафардан ортиғи ёки 56,5% (2023 йилда 53.3%) 56,7 дан юқори балл тўплаган ҳолда танловда иштирок этиш ҳуқуқига эга бўлди. 321 минг нафардан ортиғи ёки 43,5% (2023 йилда 46.7%) абитуриент 56,7 дан паст балл тўплаган ҳолда танловда иштирок этиш ҳуқуқига эга бўла олмади.