Қашқадарёлик аёл никоҳсиз туғилган чақалоғини сотмоқчи бўлди
У бунинг учун 1600 доллар ва 30 млн сўм олган.
Қашқадарёдаги тиббиёт бирлашмасида орастабон (санитарка) бўлиб ишлайдиган аёл 2024 йил 4 июнь куни туғилган чақалоғини эри билан никоҳи йўқлиги, вояга етмаган фарзанди борлиги ва бир ўзи боқишга қийналиши сабабли сотиб юбормоқчи бўлди.
У келишилган пулни 1600 доллар ва 30 миллион сўм кўринишида олаётганда қўлга олинган.
Аёл судда қисман айбига иқрорлик билдирган. Кўрсатмасида ўзи ишлайдиган жойдаги ҳамкасби ҳомиладорлигини билиб, боласини сотишини сўраган. Аёл бунга қаршилик қилганида, унга таҳдид қилганини айтган. Бола туғилганидан 2 кундан кейин таниши келишилган пулни берган вақтда палатага 5-6 нотаниш кишилар кириб келиб, қўлидан суртмалар олиб, пуллар расмийлаштириб олинганини, стрессда бўлгани учун нима бўлаётганини тушунмаганини айтган.
Аёлга нисбатан 4 йил озодликдан маҳрум қилиш жазоси тайинланган.
