Чорвоққа олиб борувчи йўлнинг бир қисми пуллик бўлади
Лойиҳа Туркия компанияси томонидан амалга оширилади.
Иқтисодиёт ва молия вазирлиги раҳбарияти ҳамда Туркиянинг “Onur Group” компаниясининг Молдова ва Руминия давлатларидаги лойиҳалар бўйича директори Булент Татар ўртасида учрашув бўлиб ўтди.
Учрашув давомида компаниянинг қурилиш ва муҳандислик соҳаларидаги фаолияти, хусусан, кўприк, тоннель, тўғон, аэропорт, трамвай ва темир йўллар қурилиши, шунингдек, шаҳар инфратузилмаси билан боғлиқ лойиҳаларни амалга ошириш тажрибаси хусусида маълумотлар тақдим этилди.
Хусусан, ДХШ асосида 4P12 “Бектемир ш. – Чирчиқ ш. – Ғазалкент ш.– Чорбоғ қўрғони” автомобиль йўлининг 6–77 км қисмини асфальт-бетон қоплама билан реконструкция қилиб, пуллик йўлга ўтказиш лойиҳаси юзасидан музокаралар олиб борилди.
Маълумот учун, лойиҳа жорий йилнинг 18 сентябрь куни “Onur Group” компанияси экспертлари, Иқтисодиёт ва молия вазирлиги ҳамда Автомобиль йўллари қўмитаси ходимлари иштирокида жойига чиққан ҳолда ўрганилган.
Учрашув якунида томонлар лойиҳани амалга ошириш бўйича тегишли ҳужжатларни тайёрлаш ва уни амалга ошириш бўйича кейинги қадамларни белгилаб олиш юзасидан келишувга эришди.
