Самарқандда итни босиб кетган аёл жазоланди
Унга 340 минг сўм жарима жазоси қўлланилган.
Самарқанд вилоятида йўлда ётган итни автомашинасида қасддан босиб кетган аёл жаримага тортилди. Бу ҳақида вилоят ички ишлар бошқармаси матбуот котиби Жаҳонгир Сагдуллаев хабар берди.
Билдирилишича, ИЖтимоий тармоқларда Дамас русумли автомашина ҳайдовчиси йўлда ётган итни атайлаб босиб ўтгани акс этган видео тарқалган ва бу кескин норозиликларга сабаб бўлган. Ички ишлар ходимлари томонидан мазкур шахснинг кимлиги аниқланган ва унга нисбатан базавий ҳисоблаш миқдорининг бир бараварида, яъни 340 минг сўм жарима жазоси қўлланилган.
“Итни қасддан босиб кетган Дамас ҳайдовчисига нисбатан Ўзбекистон Республикаси Маъмурий жавобгарлик тўғрисидаги кодексининг 111-моддасида (Ҳайвонларга нисбатан шафқатсиз муносабатда бўлиш) назарда тутилган ҳуқуқбузарликни содир этганлиги учун чора кўрилди”, дейди Жаҳонгир Сагдуллаев.
