Тошкент аэропортида 338 млн сўмлик тилла соат тўхтатиб қолинди
Ҳозирда мазкур ҳолат юзасидан божхона органлари томонидан жиноят иши қўзғатилган.
“Дубай-Тошкент” йўналиши бўйича учиб келган фуқаронинг қўл сумкаси ичидан божхона назоратига белгиланган тартибда тақдим этилмаган, жисмоний шахслар томонидан олиб кириш меъёридан ортиқ бўлган 1 дона тилла соат борлиги аниқланди.
Экспертиза хулосаларига кўра, соф вазни 151,69 грамм бўлган ушбу қўл соати қарийб 338 млн сўмга баҳоланмоқда.
Мазкур ҳолат юзасидан божхона органлари томонидан жиноят иши қўзғатилган.
Яна бир ҳолатда эса Нью-Йоркдан учиб келган фуқарога тегишли сумкалар ичида оғзаки сўровда маълум қилинмаган, йўловчи божхона декларациясида кўрсатилмаган “ROLEX OYSTER PERPETUAL DATEJUST” брендига мансуб 156 млн сўм бўлган қўл соати борлиги маълум бўлди.
Шунингдек, Дубайдан учиб келган фуқаронинг қўл ва йўл сумкалари кўздан кечирилганда, оғзаки сўровда маълум қилинмаган, жисмоний шахслар томонидан товарларни божсиз олиб кириш меъёридан ортиқ бўлган “BVLGARI” номли 1 дона билагузук ва 1 дона узук борлиги аниқланди.
Маълум бўлишича, унинг қиймати 71 млн сўмни ташкил қилмоқда.
Ушбу ҳолатлар юзасидан Маъмурий жавобгарлик тўғрисидаги Кодекснинг тегишли моддалари билан баённома расмийлаштирилган.
Эслатиб ўтамиз, жисмоний шахслар заргарлик буюмларини шахсий эҳтиёжи учун 65 граммгача (2 000 АҚШ долларидан ошмаган) бўлган миқдорда Ўзбекистон Республикаси ҳудудига божсиз олиб киришлари мумкин.
