Тошкентда мушукни деразадан улоқтирган ўқитувчи жазоланди
Мушук умуртқасининг шикаст этиши натижасида вафот этганди.
Ижтимоий тармоқларда Тошкентда ўқитувчи мушукка шафқатсизларча муносабатда бўлганлиги акс этган хабарлар тарқалганди. Ҳолат юзасидан расмий муносабат билдирилди.
Маълум қилинишича, жорий йилнинг 27 сентябрь куни соат 17:30 атрофида Учтепа туманидаги 62-сонли умумтаълим мактабининг 7-"г" синф ўқувчилари она тили дарсига ўзбошимчалик билан мушук олиб кирган. Оқибатда ўқитувчи Д.Х. ўқувчиларни дарс машғулотлари пайтида чалғимасликлари учун мушукни деразадан ташлаб юборган.
Мушук ветеринар шифокор кўригидан ўтказилганда жиддий жароҳат етмаганлиги аниқланган.
Бироқ "Эколог" ЖБ зооволонтёрлари ўқитувчини жавобгарликка тортиш учун судга беришган. Учтепа туман суди ўқитувчига нисбатан МЖтКнинг 111-моддасига кўра, 375 минг сўм миқдорда жаримага тортган.
Шунга қарамасдан, "Эколог" жамоаси бу жуда кам жарима эканлигини билдирган. Қайд этилишича, ташлаб юборилган мушукча жиддий жароҳатланиши, умуртқасининг шикаст этиши натижасида вафот этган.
"Ўқитувчи Д.Х. нафақат битта жониворнинг ўлимига сабаб бўлди, энг ёмони болаларнинг руҳиятига катта салбий таъсир кўрсатди. Фикримизча, у педагоглик фаолият олиб боришга лойиқ эмас", дейилади хабарда.
