1 млн долларлик гиёҳвандлик воситалари ишлаб чиқарган шахс қамоққа олинди
Ҳозирда ҳолат бўйича тергов ҳаракатлари давом этмоқда.
Тошкент шаҳрида нечта манзилда жойлашган гиёҳвандлик моддалари лабораториясидан фойдаланиб, синтетик гиёҳвандлик воситаларини ишлаб чиқариш билан шуғулланиб келган фуқаро ушланди.
Ҳолат ИИВ ва ДХХ ходимлари билан ҳамкорликда ўтказилган тезкор тадбир давомида аниқланган. Фуқаронинг Тошкент вилоятида жойлашган хонадони кўздан кечирилганида синтетик гиёҳвандлик воситалари, турли хил контейнерлар, қўлқоплар, тарози, газга қарши ниқоблар борлиги аниқланиб, ашёвий далил сифатида ҳужжатлаштириб олинган.
Шу куни биринчи лабораториядан 4,8 килограмм, иккинчи хонадондан 9,9 килограмм, жами 14 килограмм 795 грамм умумий нархи тахминан 1 миллион долларга тенг синтетик гиёҳвандлик воситаси аниқланиб, холислар иштирокида расмийлаштириб олинган.
Ашёвий далиллар Тошкент шаҳар ИИББ Эксперт-криминалистика маркази томонидан экспертизадан ўтказилган. Марказ хулосасига кўра олинган моддаларнинг барчаси синтетик гиёҳвандлик моддалар экани тасдиғини топган.
Ҳолат юзасидан Миробод тумани ИИО ФМБ тергов бўлими томонидан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилган.
Гумон қилинувчига нисбатан қамоқ эҳтиёт чораси танланган. Ҳозирда тергов ҳаракатлари давом этмоқда.
