“Ўзбеклар ҳаққини меҳнат қилиб топади, одам ўлдириб эмас”
Алишер Қодиров Россиядаги мигрантларни урушга чорловчи гапларга жавоб қайтарди.
Россиядаги “Справедливая Россия – за правду” партияси раиси Сергей Миронов Ўзбекистоннинг ўз фуқароларини Россияда урушга ёлланмаслиги ҳақидаги огоҳлантиришига қарши чиқиб, нега мигрантлар уларни “боқаётган” мамлакатни ҳимоя қила олмаслигини айтди ва бундай мигрантлар Россияга керак эмаслигини иддао қилди.
“Миллий тикланиш” демократик партияси раиси Алишер Қодиров бунга жавоб қайтариб, Россияни Мироновнинг ўзи ва яқинлари ҳимоя қилиши лозимлигини айтди.
“Ўзбеклар баракали халқ, ҳаққини меҳнат қилиб топади, одам ўлдириб эмас. Россияни эса Мироновнинг ўзи, ўғиллари, куёвлари, неваралари ҳимоя қилиши керак. Билишимча, руслар ҳам ватанни ҳимоя қилишни ўзбеклардек муқаддас бурч деб ҳисоблайдилар?”, деб ёзди Қодиров.
Аввалроқ Миронов ўзбекистонлик мигрантларга виза режимини жорий қилиш кераклиги, бу билан ҳаммаси ҳал бўлишини таъкидлаганди.
