Фарғонада газ баллонларини ноқонуний сақлаган “бункер”лар аниқланди
Уни сақлаган шахслар шу орқали суюлтирилган газни талон-тарож қилмоқчи бўлишган.
Фарғона вилоятининг Бувайда туманида ўтказилган рейд тадбирларида туманнинг “Деҳқонобод” ва “Дўстлик” МФЙларида суюлтирилган газ баллонларини ноқонуний сақлаш учун мўлжалланган “бункер”лар аниқланди.
Хусусан, “Деҳқонобод” МФЙда фуқаро A.T.га тегишли нотурар жойда 69 та, фуқаро Э.Ф. хонадонида 35 та “Ҳудудгаз Фарғона” газ таъминотига тегишли маиший газ баллонлари топилган.
Фуқаро A.K. маҳалладаги нотурар жойда “бункер” ташкил қилган ва у ерда 110 та маиший газ баллони аниқланган.
Шунингдек, “Дўстлик” МФЙда жойлашган фуқаро A.T. га тегишли нотурар жойда T.Х. томонидан “бункер” ташкил этилган ҳолда, 200 дона газ баллони сақланаётгани маълум бўлган.
Тадбирлар давомида жами 414 дона (314 таси суюлтирилган газ билан тўлдирилган) маиший газ баллонларидаги 6,2 минг кг суюлтирилган газ маҳсулоти талон-торож қилинишининг олди олинди.
Ҳолатлар юзасидан тегишли тартибда далолатномалар тузилган ва барча ҳужжатлар ҳуқуқ-тартибот органларига тақдим этилган.
