Боёвут тумани ҳокимига чора кўрилди
Ҳоким фермерни ҳақоратлаб, ИИБга уни қамаб қўйишни буюрганди.
Аввалроқ ижтимоий тармоқда Боёвут тумани ҳокими Дилфуза Ураловага тегишли экани айтилган аудиоёзув тарқалганди.
Сирдарё вилояти ҳокимлиги ахборот хизматининг маълум қилишича, аудиоёзувнинг ҳаққонийлиги, ҳолат қачон, қаерда ва қандай вазиятда юз берганлигига ойдинлик киритилиб, вилоят ҳокимлиги Одоб-ахлоқ комиссияси йиғилишида кескин танқидий муҳокама этилган.
Комиссия томонидан ушбу хатти-ҳаракатлар давлат хизматчиси этикаси ва одоб-ахлоқ қоидаларини бузиш, деб баҳоланган.
Ўз навбатида туман ҳокими ҳолат бўйича тушунтириш берган. Юзага келган вазиятдан пушаймонлигини айтган.
Ҳозирда йиғилиш баённомаси асосида Дилфуза Ураловага нисбатан тегишли тартибда интизомий жазо чораларини кўриш учун вилоят ҳокимига тақдимнома киритилган.
