“InnoWeek-2024” ҳафталигидан нималар кутиляпти?
Тадбирга тайёргарлик бўйича маълумот берилди.
АОКАда Инновацион ривожланиш агентлиги раҳбарияти иштирокида ўтказилган матбуот анжуманида “InnoWeek-2024” – Халқаро инновацион ғоялар ҳафталигига кўрилаётган тайёргарлик, ўтказиладиган тадбирлар юзасидан маълумот берилди.
“InnoWeek.Uz-2024” доирасида ўтказиладиган 120 дан ортиқ В2В учрашувда 10 дан ортиқ давлатдан 50 га яқин компания вакили билан инвестицион ва грант шартномаларини имзолаш кутиляпти.
“Uzekspomarkaz”нинг ITC залида ёш олимларнинг “Фан ва инновациялар” халқаро конференцияси ҳам ўтказилади. Бу йилги конференция нафақат “InnoWeek.Uz-2024” инновацион ғоялар ҳафталиги доирасида, балки “Science & Innovation for Peaceful and Sustainable Future” халқаро ёш олимлар форуми ҳомийлигида ҳам ўтказилаётгани билан аҳамиятли.
“Фан ва инновациялар” конференцияси долзарб илмий йўналишлар ва технологияларнинг ривожланишига ҳисса қўшадиган билим, тажриба ва истиқболли ғоялар алмашинуви учун ноёб платформа тақдим этади.
Тадбир доирасида фан ва инновациялар кесишмасида ётган энг долзарб масалалар, шунингдек, илғор технологиялар, тиббиёт, биология, геофизика ва бошқа муҳим соҳалардаги ютуқлар муҳокама қилинади.
Ҳафталик доирасида “Илмий ва инновацион фаолият бўйича III халқаро форуми” ҳам ўтказилади.
Форум якунида “Инновацион ғоялар етакчиси” кўкрак нишони совриндорларини тақдирлаш маросими бўлиб ўтади. “Инновацион ғоялар етакчиси” кўкрак нишони билан инновацион ғоя ва технологияларни ривожлантириш, амалиётга татбиқ этишга муносиб ҳисса қўшган иқтидорли ёшлар, ёш олимлар, талабалар ва ташаббускор фуқаролар тақдирланади.
Шунингдек, ҳафталикда иқтидорли ва муҳандис ёшлар учун алоҳида павилион ташкил этилиб, унда робототехника, дрон рейсинг, хакатон, арт инжиниринг, VR/AR, 3D моделлаштириш, дастурлаш каби йўналишлардаги турли мусобақаларга 1200 дан ортиқ ёшлар жалб қилиниб, мусобақа якуни бўйича 70 нафар ғолиб тақдирланади.
