Тошкентда сохта Ободонлаштириш ходимлари ушланди

Тошкент кўчаларида гўёки "Ободонлаштириш ходимлари" қиёфасида автоулов эгаларидан пул сўраб тиланчилик қилаётган айрим аёллар аниқланди. Бу ҳақида Чилонзор тумани ҳокимлиги маълум қилди.

 

Ҳокимлик эълон қилган видеорепортажда ободонлаштириш ходимлари мурожаат билан чиқиб, чорраҳаларда айрим аёллар ўзларини ободонлаштириш ходими сифатида таништириб, чорраҳаларда автомобиль эгаларидан пул сўраётган аёллардан бу ишидан қайтишини сўрашган.

 

Ҳокимлик масъул ходимларидан бири кўчада ободонлаштириш ходимларининг кийимларини кийиб юрган сохта ходимларнинг олдига бориб, уларни сўроққа тутганида, улар Олмазор тумани ҳокимлиги Ободонлаштириш бўлими ходимлари эканини айтишган. Шу вақтда Ободонлаштириш бўлими раҳбарига қўнғироқ қилиниб, ҳақиқатда шундай ходимлар борлигини сўралганида, тизимда бундай ходимлар йўқлиги аниқланган.

 

Сохта ободонлаштириш ходимлари улар ҳақиқатда ходим эмаслигини тан олиб, пул топишга имкони йўқлиги, шу сабаб шундай йўл орқали пул топишга мажбур бўлганини айтишган.

 

Шундан сўнг Ободонлаштиришнинг ҳақиқий аёл ходималари уларга мурожаат қилиб, бу йўлдан қайтишини илтимос қилишган.