Тошкент аэропортида 27 минг доллар пул тўхтатиб қолинди
Улар Истанбул ва Пекинга учаётган йўловчиларда аниқланган.
“Тошкент халқаро аэропорти” чегара божхона пости ходимлари бир нечта ҳолатда 27 минг АҚШ долларини ноқонуний олиб чиқишга уринишларни фош этишди.
Биргина ноябрь ойининг ўзида аниқланган мазкур ҳолатларда Истанбулга ва Пекинга учаётган йўловчиларнинг хатти-ҳаракати божхона ходимларида шубҳа уйғотгач, белгиланган тартибда божхона кўригидан ўтказилади.
Натижада Туркияга кетаётган йўловчининг қўл сумкасига 10 минг, Хитойга шайланган йўловчининг юклари орасидаги китоб ичига 5 750 АҚШ доллари яширилгани аниқланди.
Яна бир ҳолатда эса божхоначилар фуқаронинг Хитойга парвози олдидан 2 нафар йўловчига 11 минг 700 АҚШ долларини бериб, шу зайлда Ўзбекистондан олиб чиқиш режасини йўққа чиқаришди.
Нақд валюталарни олиб чиқишга доир чекловлар миллий валютага ҳам бирдек тааллуқлидир.
Эътиборлиси шундаки, фуқаролар нафақат чет эл, балки миллий валютадаги меъёрдан ортиқ пул маблағларини ҳам олиб чиқишга уринган. Ушбу ҳаракат ўз вақтида тўхтатилиб, 23 млн сўм пул маблағи ҳуқуқбузарлик ашёси сифатида вақтинча сақловга олинди.
Ҳозирда юқоридаги ҳолатлар юзасидан божхона текширувлари давом эттирилмоқда.
