Келаси йил иссиқлик ва иссиқ сув тарифлари оширилади
Тўлов тизимлари бўйича хорижий тажриба ўрганилмоқда.
2025 йил иссиқлик ва иссиқ сув тарифлари 2 маротаба оширилади. Бу ҳақида АОКАда ўтказилган матбуот анжуманида Қурилиш ва уй-жой коммунал хўжалиги вазирлиги бошқарма бошлиғи Илҳом Тўраев маълум қилди.
Илҳом Тўраевга кўра, тариф нархлари жорий йил вилоятларда бир марта, Тошкент шаҳрида эса икки марта оширилган. Кейинги йилдан эса тарифлар вилоятларда ҳам икки марта оширилади.
“Тўлов тизимлари бўйича Корея ва қўшни давлатлар тажрибасини ўрганиб чиқдик. Кўпчиликда уйда яшамасам, иссиқликка тўлайманми ёки тўламайманми деган савол туғилади. Кореяда уйнинг минимал иссиқлигини сақлаб туриш учун абонент тўлови олинади. Биз тариф сиёсатини тўғри юритсак, шунда нархларнинг ошиши ёки ошмаслиги ҳал бўлади”, дейди Тўраев.
Билдирилишича, тўловларни давлат томонидан қоплаб бериш учун жуда катта субсидия мавжуд. Субсидиядан қутулиш ва тизимни янгилаш учун эса нархлар қайта кўриб чиқилиши лозим. Тўраевга кўра, 2025 йилда тарифлар ўн беш фоиздан икки марта оширилиши мумкин.
