Сурия ўзининг тўртинчи йирик шаҳридан айрилди
Айни пайтда Дамашқнинг шимолига ҳужум давом этмоқда.
Суриянинг Дараа шаҳри жангсиз эгалланди. Ҳукумат қўшинлари Дамашқ йўналишига хавфсиз чиқиб кетиши шарти билан, таслим бўлишди. Бу ҳақида Reuters агентлиги хабар бермоқда.
Иордания чегарасидаги ушбу шаҳарнининг қўлга киритилиши билан, Асад режимига қарши мухолифат кучларининг ҳужуми янги йўналиш – жанубдан бошланди. Айтиш жоизки, 2011 йилда айнан Дараа вилоятида бошланган оммавий тартибсизликлар кейинчалик бутун мамлакат бўйлаб ёйилган фуқаролар урушига айланган эди.
Сурия ҳукумати шаҳардан чекинганини тасдиқлаб, “қайта жойлашув” амалга оширилганини ва Дараа ҳамда унга қўшни Ас-Сувайда вилоятларида “ишончли мудофаа чизиғи” ўрнатилганини маълум қилди.
Сурия армияси бундан аввал шимолда Ҳалаб ва Ҳама, шарқда эса Дайр-аз-Зор шаҳарларини йўқотган эди. Шунингдек, ҳозирда қуролли гуруҳлар Дамашқнинг шимолидаги муҳим шаҳар — Ҳомсга ҳужумни давом эттирмоқда.
Reuters хабарига кўра, Сурия армияси ҳозирча Ҳомсдан сиқиб чиқарилмаган ва бу ҳудудга Асадга иттифоқчи бўлган “Ҳизбуллоҳ” кучлари жалб қилинмоқда.
