Сурхондарёда балиқчилик фестивали ўтказилади

Жорий йилнинг 21 декабрь куни Сариосиё туманининг Себзор маҳалласида “Тўпаланг фиш” деб номланган балиқчилик фестивали бўлиб ўтади.

 

Сурхондарё вилоятида илк марта ўтказилаётган фестиваль тармоқни янада ривожлантириб, гастрономик туризмнинг мазкур йўналишига сайёҳлар оқимини кенг жалб этишга, халқимиз азалдан луқмаи ҳалол, деб эъзозлайдиган балиқ етиштириш бўйича ўзаро тажриба алмашишга хизмат қилади.  

 

Сариосиё туманида балиқчиликни етакчи тармоқлардан бирига айлантириш режалаштирилган. Тоғ ирмоқларидан ҳосил бўлган «Тўпаланг» дарёси ўзининг ноёб форел балиқлари билан танилган.  

 

Вилоят ҳокимлиги ва туризм бошқармаси ҳамкорлигида ташкил этилаётган фестивалга пухта ҳозирлик кўрилмоқда. Моҳир балиқчилар, ошпазлар ўз маҳоратини кенг намойиш этиши учун Термиз шаҳри ва туманлар павилонлари барпо этилиб, тадбир иштирокчиларига зарур шароит яратилмоқда.  

 

Фестиваль дастуридан балиқдан тайёрланган турли таомлар намойиши, вилоятдаги ўрмон хўжаликлари, табиат боғлари ва сув омборларининг балиқчилик кўргазмалари, савдо ярмаркалари ўрин олган. Шунингдек, “Энг яхши ошпаз”, “Энг ширин балиқли таом” каби йўналишларда танлов ташкил этилиб, ғолиблар диплом ва қимматбаҳо совғалар билан тақдирланади.  

 

Фестиваль санъаткорларнинг қизиқарли концерт дастури билан якунланади.