Сергелидаги “новостройка”да аҳоли газсиз яшаётгани айтилмоқда

Ижтимоий тармоқларда Сергели туманидаги янги қурилган кўп қаватли тураржойда аҳоли 5 йилдан бери газсиз яшаётгани айтилган видео тарқалди.

 

Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекцияси мазкур ҳолат бўйича расмий муносабат билдирди.

 

Қайд этилишича, Янгиҳаёт тумани Йўлдош-6 мавзесидаги ушбу турар жой МЧЖга тегишли бўлиб, объектда қурилиш-монтаж ишлари Ҳукуматнинг тегишли қарори асосида инспекцияни хабардор этмаган ҳолда ўзбошимчалик билан бошлаб юборилган.

 

Ушбу ҳолат юзасидан МЧЖга нисбатан 2021 йил 7 июль куни ёзма кўрсатма берилган. Бироқ белгиланган камчиликлар ўз вақтида бартараф этилмагач, Ўзбекистон Республикаси МЖтКнинг 99-моддаси 7-қисмида назарда тутилган маъмурий ҳуқуқбузарликлар содир этилганлиги сабабли МЧЖ раҳбарига суд органлари томонидан жазо чораси билан боғлиқ қарор чиқарилган. Хусусан, мазкур масала юзасидан Тошкент шаҳар Қурилиш Бош бошқармасига ва Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги Тошкент шаҳар бошқармасига хатлар жўнатилган.

 

Шунингдек, 2024 йилнинг 2 июлида ушбу объектга текширув ўтказиш мақсадида чиқилганида қурилиш ишлари тўхтатилганлиги аниқланган ва қурилишга жавобгар мансабдор шахслар жойига етиб келмаганлиги сабабли холислар иштирокида далолатнома тузилган.

 

2024 йил 5 ноябрда яна мониторинг ўтказилган ҳамда ҳолат юзасидан МЧЖга ёзма кўрсатма юборилган. Ҳозирги кунда инспекция мазкур ҳолат бўйича суд органларига тегишли тартибда чора кўрилиши юзасидан даъво аризаси киритмоқда.

 

“Қурувчи ташкилот ва фуқаролар (субинвестор) ўртасида тузилган шартнома шартлари бажарилишини назорат қилиш ҳудудий инспекция ваколатига кирмайди ва мазкур қурилиш объекти инспекция рўйхатидан ўтмаганлиги сабабли уйнинг кадастр ҳужжатларини расмийлаштириб берилиши тадбиркор МЧЖнинг мажбуриятидир”, дейилади хабарда.