Божи тўланмай олиб кирилган машина мусодара қилинди

Ўзбекистон Республикасининг божхона ҳудудига олиб кирилган транспорт воситасини божхона ҳудудидан ташқарига белгиланган муддатларда олиб чиқмаслик натижасида автомашина мусодара қилинди.

 

Сабаби, ҳуқуқбузар Д.С. ҳамда А.Д.лар 04 KG давлат белгиси билан бошланадиган “Lacetti” русумли транспорт воситасини вақтинча рухсатнома тугагандан сўнг юртимиз ҳудудидан олиб чиқиб кетиши керак бўлса-да, олиб чиқмасдан ҳаракатланиб юрган. Шунингдек, ҳуқуқбузарлар маъмурий жазо чораси қўлланилганидан кейин ўттиз кун ичида уни Ўзбекистон Республикасининг божхона ҳудудидан ташқарига олиб чиқиб кетишмаган.

 

Бундан ташқари, ҳуқуқбузарлар ўтказиб юборилган 349 кун муддат ичида тўланиши лозим бўлган 47 939 850 сўм миқдоридаги божхона тўловини тўламаган.

 

Шунга кўра, Д.С. ва А.Д.ларнинг ҳаракатлари Ўзбекистон Республикаси МЖтКнинг 227-16-моддаси 3-қисми билан квалификация қилиниб, суд томонидан Хўжаобод туманидаги жарима майдончасида сақланаётган “Lacetti” русумли транспорт воситаси мусодара қилиниши бўйича ижро ҳужжати Бюронинг Хўжаобод туман бўлимига юборилган.

 

Ижро ҳужжатининг ижросини таъминлаш мақсадида “Lacetti” автомашинаси 60 938 000 сўм бошланғич қиймат билан электрон онлайн-аукцион савдосига чиқарилди.

 

Келгусида сотувдан тушган пул маблағлари давлат фойдасига ўтказилади.