2025 йилда шифокорлар маоши оширилади
Соғлиқни сақлаш соҳасига 41 триллион сўм ажратилади.
Кеча, 24 декабрь куни Президент Шавкат Мирзиёев ҳузурида соғлиқни сақлаш соҳасида қилинган ишлар ва 2025 йилга мўлжалланган устувор вазифалар кўриб чиқилди.
Қайд этилишича, 2025 йилда соғлиқни сақлаш соҳасига 41 триллион сўм ажратилиши кўзда тутилган. 2024 йилда соҳага 36 триллион сўм ажратилган эди. Бунинг ҳисобидан янги шифохоналар ташкил этиш ва жиҳозлаш, тиббий кўрик қамровини кенгайтириш режалаштирилган.
Шунингдек, келгуси йил тиббиёт ходимларининг ойлик лавозим маошлари оширилади. Оилавий шифокорларнинг меҳнат самарадорлиги асосида устама тўлаш тартиби жорий қилинади.
Бу соҳадаги асосий вазифа – бирламчи бўғинда тиббиёт сифатини ошириш. Бунинг учун вазирлик вертикалини ҳудудларда тўғри ишлатиш, айниқса, чекка ва оғир туманларга эътиборни кучайтириш зарур, деди президент.
