“Метан заправка”ларни танқид қилган йигит қамалди

26 декабрь куни Тошкент шаҳар жиноят ишлари бўйича Бектемир туман суди газ қуйиш шохобчалари иш вақтларига киритилган чекловларни танқид қилган йигитни 15 сутка маъмурий қамоққа ҳукм қилди.

 

Гап шундаки, жорий йил декабрь ойининг ўрталарида республика бўйлаб кузатилган совуқ об-ҳаво сабаб энегетика вазирлиги барча метан заправкалар иш вақтига чекловлар киритган ва натижада метан газ қуйиш шохобчаларида турнақатор навбатлар пайдо бўлган эди.

 

Тошкент шаҳар Бектемир тумани ҳудудидаги шохобчаларнинг бирида навбатда турган Ғ.Д. эса киритилган чекловларни танқид қилган ва оиласини йўналишли такси хизмати ортидан боқаётгани, ногирони борлиги, метан газ шохобчалари иш режимига киритилган чекловлар ортидан оиласи таъминотини қила олмаётганини айтиб чиққан эди.

 

Тошкент шаҳар жиноят ишлари бўйича Бектемир туман суди раиси Д.А.Дадаханова раислигида ўтган суд мажлисида эса йигит МЖтКнинг 183-моддасида назарда тутилган ҳуқуқбузарликни содир қилганликда айбланган.

 

Аниқланишича, Ғ.Д. 2024 йил 23 декабрь куни Тошкент шаҳар Бектемир тумани Олтинтопган кўчасидаги газ қуйиш шохобчасида шохобча ходимларини турли сўзлар билан ҳақоратлаб, жамоат тартибини бузиб, майда безорилик содир қилган. Мазкур маъмурий иш юқорида номи келтирилган шохобча ходимининг шикоят аризаси асосида қўзғатилган.

 

Суд Ғ.Д.га МЖтКнинг 183-моддаси билан 15 (ўн беш) сутка маъмурий қамоқ жазоси тайинлади.

 

Шунингдек, жазо ўталганидан сўнг Ғ.Д.дан Тошкент шаҳар ИИББ Маъмурий тартибда қамоққа олинган шахсларни сақлаш махсус қамоқхонаси фойдасига қамалганларни сақлаш билан боғлиқ бўлган харажатлар учун маъмурий қамоқнинг ҳар бир суткаси учун базавий ҳисоблаш миқдорининг 15 фоизи миқдорида, яъни жами 843 750 сўмни давлат фойдасига ундириш ҳам белгиланган.