Фарғоналик қизалоқнинг қорнидан 135 та магнит шарча олиб ташланди
Мураккаб операция тўрт соат давом этган.
Республика шошилинч тиббий ёрдам илмий марказида тўрт соатлик мураккаб операция амалга оширилди. Унда қизалоқнинг қорнидан 135 та магнит шарча олиб ташланди.
Маълум бўлишича, қизалоқ магнит шарчалар билан ўйнаб келган ва шу жараёнда улардан анча-мунчасини ичига ютган. Вақт ўтиши билан шарчалар қорнида йиғилиб қолган ва унинг ҳаётига жиддий хавф солган. Ота-онаси зудлик билан Республика шошилинч тиббий ёрдам илмий маркази Фарғона вилояти филиалига мурожаат қилади.
Текширувлар ўтказилганида қориннинг икки ёнида магнитлар йиғилиб қолгани аниқланган. Шифокорлар консерватив усулда даволашга киришиб, қайд қилдириш орқали шарчалардан 14 донасини чиқариб олади.
Шундан сўнг, ота-она боласини Тошкент шаҳридаги Республика шошилинч тиббий ёрдам илмий марказига олиб келади. Бу ерда гўдак яна бир бор текширувдан ўтказилгач, жарроҳлик амалиёти бошлаб юборилади.
Шифокорлар саъй-ҳаракати билан қизалоқ қорнидаги 135 та магнит шарча олиб ташланади. Айни чоғда қизалоқ шифокорлар назоратида ўзини яхши ҳис этмоқда.
