Марказий банк 9 та банкка огоҳлантириш берди
Шунингдек, учта молия ташкилотини жаримага тортди.
Марказий банкнинг Банк назорати қўмитаси ўтган йилнинг декабр ойидаги йиғилишларида 37 та масалани кўриб чиққан ва тегишли қарорлар қабул қилган. Бу ҳақида регулятор матбуот хизмати хабар берди.
Қайд этилишича, йиғилишлар давомида кредит ташкилотларининг молиявий ҳолатига оид 10 та масала – Марказий банкнинг кўрсатмалари ва пруденциал меъёрлари талабларининг бажарилиши ҳамда тижорат банклари, микромолия ташкилоти ва тўлов ташкилотларида ўтказилган ўрганиш ва текширишлар натижалари ҳам муҳокама қилинган.
Тижорат банклари, микромолия ташкилотлари ва тўлов ташкилотларида ўтказилган ўрганишлар натижасида аниқланган камчиликлар, жумладан, Марказий банкнинг кўрсатмалари ва пруденциал меъёрлари талабларига, шунингдек, валюта ва ташқи савдо операцияларини амалга оширишда қонунчилик талабларига риоя қилмагани учун 9 та банк, иккита ломбард ва битта микромолия ташкилоти чора ҳамда санкциялар қўлланилиши тўғрисида огоҳлантирилган.
Шунингдек, амалдаги қонунчилик, Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар учун битта банк, битта ломбард ва битта микромолия ташкилотига нисбатан жарима санкцияси қўлланилган.
