“Uzbekistan airways” 2 тилда хизмат кўрсатиши таклиф қилинди

“Миллий тикланиш” партияси етакчиси Алишер Қодиров “Uzbekistan Airways” миллий авиакомпаниясининг тил сиёсатини қайта кўриб чиқиш зарурлигини таъкидлади.

 

Сиёсатчининг сўзларига кўра, туризм нафақат бюджетни тўлдириш воситаси, балки мамлакат маданияти ва миллий ўзига хослигини тарғиб қилишнинг самарали усулидир.

 

Депутат авиакомпания нима учун йўловчиларга учта тилда хизмат кўрсатиши кераклиги тўғрисида савол берди.

 

“Йўловчиларнинг 20 фоизи инглиз, қолган 75 фоизи ўзбек тилини тушунади. 5 фоиз тасодифлар бўлиши мумкин. Миллий авиакомпания нима учун йўловчиларни қўшимча вақтини олади? Ҳамма жойда учта тилда, лекин авария ҳолатида самалётдан чиқиш эшикларидан фойдаланиш ҳақидаги жуда муҳим қўлланма рус ва инглиз тилида. Миллий компаниянида бироз миллий ғурур бўлиши керак, давлат тили ва кенг қўлланиладиган халқаро тиллардан биттаси ишлатилса, вақт ҳам тежалар эди”, — дея таъкидлади Қодиров.

 

Қодировнинг фикрича, “Узбекистан Аирвайс” давлат тилига кўпроқ эътибор қаратиши керак. У фақат ўзбек ва халқаро миқёсда кенг қўлланиладиган битта тилни ишлатиш нафақат вақтни тежашга, балки миллий маданият ва ўзига хосликка ҳурмат кўрсатишга ёрдам беришини таъкидлади.

 

“Миллий авиакомпания давлат тилига ва вақтни оқилона ишлатишга нисбатан ўз муносабатини қайта кўриб чиқиши керак”, — деди у.

 

Депутат миллий ғурурни намоён қилиш миллий авиакомпания учун устувор вазифалардан бири бўлиши кераклигини таъкидлади. Унинг фикрича, бундай ўзгаришлар Ўзбекистоннинг халқаро майдондаги маданий имижини мустаҳкамлашга хизмат қилади.