40 турдаги аллергия билан яшаётган қиз

Хемпширлик 19 ёшли Хлоя Ремси ҳар куни курашадиган 40 дан ортиқ турдаги аллергия ҳақида айтиб берди.

 

Хлоя Ремси жуда кам учрайдиган касаллик – акваген уртикария, яъни сувга аллергия билан яшайди. Унинг танасига сув тегган заҳоти териси қичийдиган тошмалар билан қопланади, бу эса унга терисида чумолилар ўрмалаётгандек туюлади. Ремси берган интервьюсида бу ҳолатнинг қанчалик азобли эканини тасвирлаб, баъзида ҳатто терисини пичоқ билан қириб ташлаш истаги пайдо бўлишини тан олди.

 

Хлоя олти ойлигидан бошлаб турли аллергиялардан азият чекади, аммо яқинда унга "озиқ-овқат чанги синдроми" ташхиси қўйилди. Бу унинг организми турли маҳсулотларга, жумладан, банан, картошка, қулупнай, киви, ҳатто желатинли ширинликлар ва атирларга ҳам қандай реакция беришини тушунтириб беради. Бироқ сувга аллергия унинг энг ноодатий ва тушунарсиз касаллиги бўлиб қолмоқда.

 

У ҳаётида сув билан боғлиқ кўплаб нохуш воқеаларни бошидан кечирган. Масалан, бир сафар поездни кутаётиб, ёмғир остида қолганида, уйга етиб келгунча қаттиқ қичишиш азобидан қийналганини эслайди: "Мен гиёҳвандга ўхшаб қичишишдан тўхтай олмасдим", – дейди у.

 

Хлоя кўп марта ҳаёти учун хавфли аллергик реакциялар, жумладан, анафилактик шок ҳолатига тушган ва шунинг учун бир неча бор шошилинч тиббий ёрдамга мурожаат қилишга мажбур бўлган. Аллергияларни назорат қилиш учун у ойига икки марта махсус инъекция қабул қилади, аммо улар фақат қисман ёрдам беради.

 

Шунга қарамай, у ҳаётга ижобий қарашга ҳаракат қилади. Аллергияларини кузатиш ва уларнинг оғирлик даражаларини таҳлил қилиш учун Эхсел жадвалида махсус рўйхат юритади. Бу эса унга организмининг ўзгаришларини назорат қилишга ёрдам беради.

 

Хлоянинг ҳикояси дунёда кам учрайдиган, аммо ҳаётни сезиларли даражада қийинлаштирадиган касалликларнинг мавжудлигини яна бир бор исботлайди.

 

Комила Одилова тайёрлади