Маймун сабаб бутун Шри-Ланка чироқсиз қолди
У 22 миллион аҳолининг электр таъминотини издан чиқарди.
“Маймун тармоғимиздаги трансформатор билан ўйнаган ва бу тизимда мувозанатсизликни келтириб чиқарган”, — деб тушунтирди Шри-Ланка энергетика вазири Кумара Жаякоди.
Ушбу ҳодиса якшанба куни эрталаб соат 11 атрофида оролда тўлиқ электр таъминотининг узилишига сабаб бўлди.
Маймун учун фожиали якунланган воқеа Шри-Ланка пойтахти Коломбонинг жанубидаги электр подстанциясида юз берган.
Шундан сўнг электр таъминотини қайта тиклаш босқичма-босқич амалга оширилди, аввало, касалхоналар ва сув тозалаш станцияларига электр берилди.
Шри-Ланка ижтимоий тармоқ фойдаланувчилари ушбу воқеа юзасидан турли ҳажвий изоҳлар ва ҳукуматга қарши кинояли фикрлар билдиришди.
“Даилй Миррор” газетасининг душанба куни нашр этилган мақоласида энергетика бўйича мутахассислар йиллар давомида кетма-кет алмашиб келаётган ҳукуматларга электр тармоқларини модернизация қилиш кераклигини айтиб келганини эслатди.
“Шри-Ланка электр тармоқларининг ҳолати шунчалик ёмонки, ҳатто битта электр узатиш линиясида муаммо юзага келса ҳам бутун мамлакат бўйлаб электр узилиши мумкин”, — дея газета номаълум муҳандиснинг сўзларини келтирди.
2022 йилда Шри-Ланкада электр узилишлари мунтазам содир бўлган, аммо бунга маймунлар эмас, балки иқтисодий инқироз сабаб бўлган эди. Хабарларга кўра, иқтисодий инқироз туфайли мамлакат ёқилғи сотиб олиш учун етарли маблағ топа олмаган.
