Ижтимоий тармоқлар ёлғизликни кучайтиради

Америкалик олимлар ижтимоий тармоқлардан фойдаланиш инсоннинг ёлғизлик ҳиссини камайтириш ўрнига, аксинча, уни кучайтиришини аниқлашди.

 

Бейлор университети олимлари тўққиз йил давомида Нидерландиядаги 7 мингдан ортиқ катта ёшли инсонларнинг рақамли одатларини таҳлил қилиб, ижтимоий тармоқларнинг руҳий фаровонликка таъсирини ўрганишди.

 

Натижалар шуни кўрсатдики, ижтимоий тармоқлардан фойдаланиш шакли қандай бўлишидан қатъи назар – фаоллик билан постлар жойлаш ёки шунчаки тармоқларни кузатиш – инсоннинг ёлғизлик ҳиссини камайтирмайди, балки уни кучайтириши мумкин.

 

Тадқиқотчилар виртуал алоқа инсоннинг ижтимоий эҳтиёжларини қондириш учун етарли эмаслигини таъкидлашди. Тадқиқот муаллифи, профессор Жеймс Робертснинг сўзларига кўра, ижтимоий тармоқлар инсонларни глобал ҳамжамият билан боғлагандек туюлсада, улар реал ҳаётдаги инсоний алоқаларни тўлиқ алмаштира олмайди.

 

Шунингдек, олимлар ушбу жараённинг икки томонлама эканини аниқлашди: ёлғизлик ҳисси кучли бўлган инсонлар кўпроқ ижтимоий тармоқларга мурожаат қилишади, аммо бу уларнинг аҳволини яхшилаш ўрнига янада оғирлаштиради.

 

Тадқиқотчилар ушбу натижалар руҳий саломатликни қўллаб-қувватлаш ва ижтимоий тармоқлардан соғлом фойдаланиш бўйича тавсиялар ишлаб чиқишда муҳим аҳамиятга эга эканини таъкидлаб, келгусида мавзуни янада чуқурроқ ўрганиш лозимлигини қайд этишди.

 

Комила Одилова тайёрлади