Испанияда одам савдосининг йирик тармоғи фош этилди
Улар 1000 дан ортиқ аёлларни алдов йўли билан сотган.
Испания полицияси одам савдоси билан шуғулланган йирик жиноий гуруҳни ушлади. AFP агентлигининг хабарига кўра, ушбу гуруҳ сўнгги бир йил ичида 1000 дан ортиқ аёлларни ноқонуний операцияларга жалб қилган.
Жиноятчилар асосан Жанубий Америкадан, хусусан, Колумбия ва Венесуэладан келган аёлларни ёлғон иш таклифлари билан Испанияга жалб қилган. Уларнинг аксарияти жинсий эксплуатация қурбонига айланган.
Полиция операцияси натижасида 48 нафар аёл қутқарилган ва 48 киши қўлга олинган. Улардан уч нафари – икки колумбиялик ва бир испаниялик – гуруҳ етакчилари экани маълум бўлди. Ҳибсга олинганларнинг аксарияти Испаниянинг Аликанте шаҳрида сақланмоқда.
Жабрланган аёллар фаррошлик ёки гўзаллик салонларида иш топиш ваъдаси билан алданган. Аммо Испанияга етиб келганларидан сўнг жинсий эксплуатация қилинадиган клубларга юборилган. Уларга кунига атиги икки соат ташқарига чиқишга рухсат берилган, қолган вақт эса видеокузатув остида бўлишган.
Ҳозирда полиция терговни давом эттирмоқда, гумонланувчилардан олти нафари тергов изоляторига жойлаштирилган.
