Дрифт ва йўл безорилигига қарши янги чора-тадбирлар белгиланди

 

2025 йил 21 февралдан бошлаб Ўзбекистон Республикасида йўл ҳаракати қоидаларини қўпол равишда бузиш, жумладан, дрифт қилиш ва йўл безорилиги ҳолатлари учун янги жавобгарлик чоралари белгиланди. Бу Ўзбекистон Республикасининг “Йўл ҳаракати хавфсизлиги тизими такомиллаштирилиши муносабати билан Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига қўшимча ва ўзгартиришлар киритиш тўғрисида”ги қонуни асосида амалга оширилди.

 

Тошкент давлат юридик университети ўқитувчиси Жавоҳир Эшонқуловнинг маълумотига кўра, янги тартибга мувофиқ қуйидаги ҳуқуқбузарликлар учун маъмурий жавобгарлик белгиланган:

• Транспорт воситасини қасддан сирпантириб бошқариш (дрифт қилиш),
• Бошқа ҳайдовчиларга қасддан тўсқинлик қилиш,
• Йўлда кескин ва узлуксиз ҳаракатланиш,
• Йўловчилар ҳаётига хавф туғдирувчи ҳаракатларни амалга ошириш.

 

Мазкур қоидабузарликлар учун қуйидаги санкциялар қўлланади:

1. Дрифт ва йўл безорилиги содир этган ҳайдовчиларга – базавий ҳисоблаш миқдорининг 25 баравари (9 млн 375 минг сўм) миқдорида жарима ёки 1 йилдан 2 йилгача ҳайдовчилик ҳуқуқидан маҳрум қилиш жазоси.

2. Агар ушбу ҳуқуқбузарликни ҳайдовчилик гувоҳномасига эга бўлмаган ёки ундан маҳрум этилган шахс содир этса – энг кам ойлик иш ҳақининг 50 баравари (18 млн 750 минг сўм) миқдорида жарима ёки 15 суткагача маъмурий қамоқ жазоси.

3. Гуруҳ бўлиб ҳаракат қилиб, йўл ҳаракати хавфсизлигига таҳдид солган шахсларга – базавий ҳисоблаш миқдорининг 3 бараваридан 5 бараваригача (1 млн 875 минг сўмдан юқорига) жарима.

 

Мазкур қонун йўл ҳаракати хавфсизлигини таъминлаш ва ноқонуний ҳаракатларнинг олдини олишга қаратилган.