Тошкентда фуқаро газ портлатиб жонига қасд қилди
Ҳозирда ҳодиса юзасидан тергов-суриштирув ишлари олиб борилмоқда.
Тошкент шаҳридаги кўп қаватли уйларнинг бирида газ портлаши юз берди. Фавқулодда вазиятлар бошқармаси ҳодиса тафсилотларини эълон қилди.
Воқеа жойига ёнғин-қутқарув экипажлари соат 15:29 да етиб боришган. Маълум бўлишича, 9-қаватдаги хонадонда газ чақнаши натижасида ёнғин келиб чиққан. Ёнғин соат 16:07 да ўчирилган.
Қутқарувчилар олти нафар фуқаро ҳаётини сақлаб қолиб, уларни тез тиббий ёрдам хизматига топширишган. Ҳозирда жабрланганларнинг аҳволи ўрганилмоқда.
Дастлабки текширувларга кўра, ёнғин хонадон эгасининг газ плитасини ёқиб ўз жонига қасд қилишга урингани натижасида юзага келган. Газ-ҳаво аралашмасининг чақнаши портлашга сабаб бўлган. Шундан сўнг фуқаро 9-қаватдан пастга сакраб жонига қасд қилган.
