Темурий шаҳзода кўчирган Қуръон нусхаси Ўзбекистонга қайтади

Темурийлар даврида илм-фан ва санъат тараққиётида катта ҳисса қўшган Иброҳим Султон қўли билан кўчирилган ноёб Қуръон нусхаси бўйича илмий тадқиқотлар давом этмоқда. Ҳозирда ушбу тарихий қўлёзманинг бир нечта нусхаси Эрон ва бошқа халқаро фондларда сақланаётгани маълум.

 

Манбаларга кўра, 1423 йилда сулс хатида кўчирилган бир нусха Остони Қудси Ризавий кутубхонасида, яна бир нусха эса 1937 йилгача Шероздаги “Қуръон дарвозаси”да сақланиб, кейинчалик Порс музейига ўтказилган. Ушбу икки жилдли қўлёзма ўзининг бадиий жиҳатдан нафислиги ва безаклари билан алоҳида ажралиб туради. Бундан ташқари, Иброҳим Султон томонидан кўчирилган яна бир нусха Метрополитен музейида сақланаётгани ҳақида маълумотлар мавжуд.

 

Қуръон қўлёзмаларининг юксак хаттотлик санъати билан ижро этилгани, зарғалдоқ ва олтин безаклар билан ёзилгани олимлар диққат марказида. Айни пайтда ушбу ноёб асарнинг факсимиле нусхаси тайёрланмоқда ва келгусида Ўзбекистондаги Ислом цивилизацияси маркази экспозициясида намойиш этилиши режалаштирилган. Бу борада тадқиқот ишларини филология фанлари доктори Афтондил Эркинов олиб бормоқда.